EK DIN ACHANAK

 

Aaj College mein Fresher Day hai. Main aur mere dost bas tayyar ho rahe hain College jaane ke liye. Yun to hum college kabhi time se nahin jaate lekin Fresher Day par sabki ragging karne jaroor waqt se pehle pahuchna hota hai chahe dharti yahan se wahan kyun na ho jaye.

 

Gharwale bhi mujhe dekhkar hairan ho gaye ki Ravi aaj suraj kahan se ug gaya, Roz 10-11 baje uthne wala tu aaj 7 baje hi uth gaya. To maine kahan mummy aaj ek dost ke saath bahar jaana hai (yun to keh nahin sakta tha ki College jaldi jaana hai class ke liye kyunki use sunke to unke hosh hi ud jaate. Unhone bhi koyi khaas dhyaan nahin diya aur mera naasta table par laga diya.

 

Naasta karke maine apne doston ko phone lagaya aur jaldi college pahuchne ke liye kaha aur apni Motorcycle par nikal pada college ke liye. College hamaara 9 baje shuru hota tha aur main 15 minutes pehle wahan pahunch chuka tha. Itne mein maine dekha ki mere dost Jay, Pawan aur Sanju teeno ek saath do motorcycle par aa rahe hain. Bas fir kya tha hum log tayyar ho gaye Freshers ki ragging ke liye.

Ragging to karne pahunch gaye lekin hamein ab bhi apne khaas do doston ka intezaar baaki tha. Khaas isliye kyunki wo dono ladkiyan thi. (Aap samajh hi gaye honge) Intezaar karte karte 9:15 ho gaye lekin wo nahin aayi. Idhar students bhi aane shuru ho gaye the kuch seniors hamaari tarah ragging karne ke liye aur kuch freshers apni ragging karwane ke liye. Maine kayi baar phone lagaya lekin unka phone nahin lag raha tha.

 

Mujhe bahut chinta hone lagi to maine Pawan ko bola yaar tu jaa kar dekh to dono kahan reh gayi. Chinta unke naa aane ki nahin thi balki hamaara ragging karne ka jo tareeka hai uske chaupat hone ki

thi. To Pawan ne kaha theek hai wo chala jayega lekin use aaj shaam ko Riya ke saath Movie dekhne aur dinner karne ka saara kharcha tujhe uthana hoga. Marta kya na karta mujhe uski baat manni padi.

 

Lekin haye ri meri kismat mujh par kaise meharbaan ho gayi ki wo mujhe saamne se aati dikhai di. Maine dekha ki Pawan ka chehra unhen khaas kar ke Riya ko dekh kar khilne ki bajay Shaam kharab hone ke ehsas se murjha gaya hai. Mujhe uska chehra dekh kar hasi aa gayi aur maine kaha ki yaar kyun tension le raha hai. Dono aa gayi hai to kya hua Ravi ka waada khali nahin jayega. Pawan meri baat sunke bahut khus ho gaya aur mujhe gale se laga liya.

 

Wo dono akeli nahin aayi thi unke saath ek aur ladki bhi thi jise main nahin dekh paya tha kyunki unke hamaare paas pahuchne ke dauran mujhe Cold Drinks and Some Snacks lene jaana pada (Kya hai saara kharcha mujhe hi uthana padta hai sabka) Lekin jab wapas aaya to hairan reh gaya ki unke saath ek behad khubsoorat ladki khadi hai. Mere pair wahi door rook gaye aur use dekhne lage. Pehle to maine socha ki koi fresher hai jise in logon ne milkar ragging ke liye pakad liya hai lekin jis tarah se wo ladki hamaari doston se baat kar rahi thi usse pata chalta tha ki wo kaafi acchi tarah se ek dusre ko jaanti hain.

Doston mein pehle apne baare mein aur apne group ke baare mein aap logon ko bata doon

 

1.  Ravi: Mein Ravi, umar 22 saal, kad 5\'7" rang fair (Ab itna bhi nahin ki ladkiyan dekhte hi mar miten aur itna bhi bura nahin ki koi ghaas na dale), theek thak physique (kyunki roz shaam ko adha ghanta Jim mein paseena jo bahata hoon. Subah to sokar hi der se uththa hoon) Reaching in 3rd year. Father Ek bade Govt Afsar hai isliye paise ki koi chinta hi nahin hai aur mummy housewife hain

2.  Jay: Jay ki umar 21 saal hai aur rang saanwla hai lekin padhne mein hamaare group mein sab se hoshiyaar. Class mein sabse jyada number usi ke aate hain. Apart from dosti use saath rakhne ka ek karan ye bhi hai taaki wo hamaari exams mein help kar diya karta hai  Father uske shopkeeper hain aur uski mummy bhi housewife. Jyada paisa to nahin milta use pocket money ke liye lekin itna bhi kam nahin hai ki wo apna kharcha na utha sake haan jyada faaltu kharch nahin kar sakta.

 

3.  Pawan: Pawan ki umar bhi 22 saal hai aur wo mere saath tab se hai jab hum 6th class mein padhte the. Main aur wo ek dusre ke humraaz hain. jaise do jism ek jaan (Galat mat samajhna aap log)  matlab bahut achhe dost hain. Uske parents ab is duniya mein nahin hai aur wo apne mama ke paas rehta hai jo hamaare ghar ke ekdum paas hai. Isliye use kuch khaas pocket money nahin milti aur uska saara kharcha mujhe hi uthana padta hai. Wo Riya se aur Riya usse behad pyaar karte hain. Aur ye affair 2 saalon se chal raha hai.

 

4.  Sanju: Sanju ki umar 23 saal hai. Handsome, tall and flirt type ka banda hai. Shayad hi aisa hua ho ki koi ladki use pasand aayi ho aur wo uski dost na ban gayi ho. Uske Father aur mother dono service karte hain to mahashay ke paas poora time hai masti karne ke liye. Meri tarah use bhi paison ki koi kami nahin hai lekin saala bahut kanjoos hai. Ladkiyon par to hajaaron kharch kar deta hai lekin doston par kharch karne ke naam se saale ki jaan sookhti hai. Aisa nahin ki hamaare upar kharch nahin karta lekin bas haath rok rok kar kharch karta hai

 

5.  Riya: Riya ki umar 20 saal, Medium Height, Fair colour, slim body, nice curves aur sabse attractive uski smile jiske karan hamaara Pawan uske pyaar mein giraftar ho gaya. Aur wo bhi Pawan ke hi karan hamaare college mein aayi warna to uske parents uska admission kisi bade college mein karwane wale the. Uske Father ek doctor hain aur mother housewife. Uski sister bhi hamaare group mein hai.

 

6.  Diya: Riya ki sister ki umar 19 saal, Tall, slim and very cute face with sweet smile, colour very fair. Ab uska man to nahin tha is college mein admission mein lene ka lekin wo apni behan se bahut pyaar karti hai aur usse door hone ke dar se hi usne is college mein admission liya tha. Lekin mujhse milne ke baad aur hamaara group join karne ke baad use apne kiye ka koi pachtawa nahin hota 

Episode 1

 

Jaisa ki aap jaante hai ki Main aur Pawan bachpan se hi ek doosre ke saath saath rahe hain. School aana-jaana khelna koodna, dopahar ka lunch sab ek saath hi karte the.

 

School mein hamaari dosti se jalne waale bhi kam nahin the. Hamaari class mein Ram kumar naam ka kuch badmaash type ka ladka padhta tha jise hum sab dost Rider keh kar pukarte the kyunki saala mootne bhi jaana ho to bagair motorcyle ke jaata hi nahin tha. Ameer baap ki bigdi hui aulaad jo tha. Jo marzi mein aaye wo karna. Teacher ko kuch na samajhna.

 

Yahan tak ki ek baar usne ek teacher ko kisi baat par thappad bhi maar diya tha lekin uska kuch nahin hua kyunki sabke saamne usne us teacher par aisa ghinona aarop laga diya tha jiske saamne sabko Rider ka kiya dhara sahi lagne laga. Usne aarop lagaya ki wo teacher uski maa ke baare mein ashlil baatein karta hai aur akele mein usse bhi gandi harkaten karta hai. Is ghatna ke baad us teacher ka is school mein sar utha ke chalna mushkil ho gaya aur wo is school ko chod kar hamesha ke liye chale gaye.

 

Uske saath hum dono doston khaskar Pawan ki lagbhag roz hi jhadap ho jaya karti thi. Kabhi class mein aage baithne ko lekar, kabhi teacher ne koi test liya ho aur Pawan ne use na bataya ho to

us baat par (Kyunki Teacher Roll no se sab ko baithta tha aur Rider ka Roll no theek Pawan ke baad tha). Pawan ek bahut seedha saada banda hai. Wo mere siwa kisi se baat nahin karta tha. Isliye Test mein bhi wo Rider ki koi help nahin karta tha aur isi karan Rider usse jalta tha par mere karan jyada kuch kar nahin pata tha.

 

Pawan mere ghar ke paas hi rehta hai to Aata mere saath hi tha. Isliye Rider ko mauka nahin milta tha kuch karne ke liye aur Pawan bhi ye baat achi tarah se jaanta tha isliye agar kisi din main school nahin jaata tha to wo bhi koi na koi bahaana dhoond hi leta tha School na jaane ka.

 

Lekin honi ko kuch aur hi manjoor tha.

 

Ek Din achanak mujhe teen chaar din ke liye apne parents ke saath Dusri city jaana pada. Huya kuch aisa ki hamaare khaas relatives ke yahan kisi ki shaadi thi to main mana bhi nahin kar paya. Mujhe Pawan ki bahut chinta sata rahi thi ki mere bagair Rider uska kya haal karega lekin main kuch nahin kar sakta tha.

 

Sabse badi dukh ki baat ye hui ki achanak mujhe raat ko gharwalo ne bataya ki subah jaldi jaana hai out of station to main Pawan ko bata bhi nahin paya apni absence ke baare mein. Maine kai bahane banaye uske ghar jaane ke liye jaise Leave application deni hai to jawab mila ki papa already class teacher se phone par baat kar chuke hain. Phir bahana banaya ki meri kuch books and copy uske paas hai to mujhe yun dekhne lage ki maine koi joke sunaya ho.

Main unhe dekhkar sharam se paani paani ho gaya.

 

To sab milakar yeh hua ki main uske ghar nahin jaa saka aur subah 5:00 baje hum apni car mein baithkar nikal gaye. Maine subah bhi koshish karni chahi lekin phir socha ki sab soye honge is samay to jagana theek nahin hai. Phone unke ghar par tha nahin so phone bhi nahin kar paya 

 

Agle din Subah Pawan tayaar hokar mera wait karne laga ki kab mein aayun uske ghar aur hum school jayen. Lekin main aayun to tab jab wahan hoyunga. Pawan mera intezar karte karte late ho gaya aur mere ghar par aaya pata karne ke liye. Aakar dekha to tala laga huya hai to usne bagal wale ghar mein poocha to unhone bataya ki ek shaadi mein wo out of station gaye hain aur 3-4 din mein aayenge.

 

Pawan ye sab sunkar udaas ho gaya aur apne ghar wapas aa gaya. School ke liye late to ho hi gaya so us din wo school nahin jaa paya. Uske ghar par maama-Maami ne poocha to tabiyat kharaab hone ka bahana bana diya aur apne kamre mein jaakar baith gaya.

 

Poora Din reh reh kar use meri yaad aati rahi aur aaye bhi kyun mera sabse pyaara aur pakka dost tha. Bechara poore din bore hota raha kyunki bimaari ke bahane ki wajah se wo TV bhi to nahin dekh sakta tha. Poora din kuch sone mein aur kuch kitaabo mein sar ko khapakar bitaya. Raat huyi to wo sab bhoolkar so gaya.

 

Agle din wohi routine aur wo tayyar hokar mera intezaar karne laga lekin tabhi use yaad aaya ki main to yahan hun nahin to use akele jaana padega. Wo man masos kar school ke liye nikal pada. Raaste bhar bas wo yehi dua karta raha ki Hey Bhagwan aaj Rider nahin aaye. Mera usse saamna nahin ho. Wo bhi kahin bahar chala gaya ho.

 

Lekin jo hona hai wo to hokar hi rehta tha.